9-may umumxalq bayrami “Xotira va Qadrlash kuni”ga tayyorgarlik ko'rish, Ikkinchi jahon urushi qatnashchilari, nogironlari, urush orti va mehnat faxriylari hamda yolg'iz keksalarni ijtimoiy himoya qilish, o'zaro mehr-oqibat va hamjihatlikni yanada kuchaytirish, beg'araz yordam, mehr-muruvvat kabi ezgu fazilatlarni yuksaltirish, umumxalq bayrami arafasida qishloq va shaharlardagi mahallalar, aholi turar joylarini obodonlashtirish, viloyatning barcha hududlarida sanitariya holatini yaxshilashni ta'minlash maqsadida 1. “Nuroniy” jamg'armasi viloyat bo'limi, viloyat Kasaba uyushma tashkilotlari birlashmasi, “Kamolot” yoshlar ijtimoiy harakati viloyat bo'limi Kengashi, “Mahalla” xayriya jamoat fondi viloyat bo'limi hamda viloyat Xotin-qizlar qo'mitasining 2012 yil 5 may kuni viloyatda urush qatnashchilari, urush orti va mehnat faxriylarini ijtimoiy moddiy qo'llab-quvvatlash maqsadida xayriya hasharini o'tkazish to'g'risidagi tashabbuslari ma'qullansin. 2. Xayriya hashariga tayyorgarlik ko'rish va o'tkazishni muvofiqlashtirish komissiyasi tarkibi ilovaga (berilmaydi) muvofiq tasdiqlansin. 3. Shahar, tuman hokimliklari “Nuroniy” jamg'armasi viloyat bo'limi, korxona va tashkilot rahbarlari bilan birgalikda xayriya hasharini o'tkazish rejasini ishlab chiqsin va unda qo'yidagilarni nazarda tutsinlar: turar-joy mavzelari va mahallalarda gul ko'chatlari, mevali va manzarali daraxtlar ekish, ularga shakl berish, ko'cha va yo'laklarni tartibga keltirish, chiqindilarni to'plash va tashib ketilishini tashkil qilish; ko'p qavatli uylar va hovlilar atrofi, bolalar maydonchalari, guzarlar, xiyobonlar, ziyoratgohlar va qabristonlar, ariqlarni, kanalizasiya quduqlarini tozalash va tartibga keltirish; xayriya hashari qatnashchilarini zarur texnika vositalari va anjomlar bilan ta'minlash. 4. Mulkchilik shaklidan qat'iy nazar barcha korxona va tashkilotlar, muassasalar ishlab topilgan bir kunlik ish haqi miqdoridagi mablag'ni “Nuroniy” jamg'armasi viloyat bo'limining ATIB “Ipoteka bank” Qashqadaryo viloyat bo'limidagi H/R: 20212000804404500001, MFO: 00190, INN: 202131376, OKNX: 98600 hisob raqamiga o'tkazib berilishi tavsiya etilsin. Mazkur mablag'lar viloyatda urush qatnashchilari, urush orti va mehnat faxriylari hamda yolg'iz keksalarni ijtimoiy va moddiy qo'llab-quvvatlash yuzasidan ko'zda tutilgan tadbirlarni bajarish uchun sarf etilishi belgilab qo'yilsin. 5. Viloyat ichki ishlar boshqarmasi (Haydarov)ga hashar davomida mahallalar, ko'chalar, xiyobonlar, istirohat bog'lari, tashkilot va korxonalarda jamoat tartibini saqlash, yong'in xavfsizligini ta'minlash choralarini ko'rish, texnika vositalaridan foydalanishni qat'iy nazoratga olish topshirilsin. 6. Shahar, tuman hokimliklari “Nuroniy” jamg'armasi viloyat bo'limi (Inoyatov), viloyat kasaba uyushma tashkilotlari birlashmasi (Rajabov), “Mahalla” xayriya jamoat fondi viloyat bo'limi (Po'latov), “Kamolot” YOIH viloyat bo'limi Kengashi (Jalilova) bilan birga fuqarolarning o'z-o'zini boshqarish organlari, uy-joy mulkdorlari shirkatlari, korxona, tashkilot va muassasalarni, shuningdek, viloyatning barcha aholisini xayriya hashariga keng jalb etish choralarini ko'rsinlar. Yakuniy ma'lumotlarni umumlashtirish “Nuroniy” jamg'armasi viloyat bo'limi va “Mahalla” xayriya jamoat fondi viloyat bo'limiga topshirilsin. 7. Viloyat teleradiokompaniyasi (Nusurov), “Qashkadaryo” (Ravshanov), “Novosti Kashkadari” (Rajabov) gazetalariga xayriya hasharining o'tkazilishini keng yoritish tavsiya etilsin. 8. Ushbu farmoyishning bajarilishini nazorat qilish viloyat hokimining o'rinbosarlari M.Hayitmurodov va A.Djuraev zimmasiga yuklatilsin.
