Qonun talabi va javobgarlik hissi Qo'shilgan sana: 2010-02-01 Muallif: T.NIZOMOV.
Avtomobil transportida yo'lovchilar tashish jabhasida faoliyat ko'rsatayotgan har bir korxona, har bir uyushma rahbari zimmasidagi mas'uliyatni chuqur his etib, belgilangan tartib-qoidalarga qat'iy rioya qilishi va jamoasi a'zolarining ham qonun talablarini so'zsiz bajarishini ta'minlashi shartdir.
Shahar atrofi va shaharlararo viloyat ichki yo'nalishlarida yo'lovchilar tashishni tashkil etish bo'yicha viloyat komissiyasining majlisida bu haqda so'z yuritilar ekan, mazkur sohada kamchiliklarga yo'l qo'yayotgan mutasaddilar faoliyatiga tanqidiy baho berildi. Xususan, majlisda avtokorxonaning moddiy-texnik bazasini mustahkamlash hamda kadrlar salohiyatini oshirish masalasiga alohida e'tibor qaratilib, ayrim uyushmalarning rahbarlari yo'lovchi tashish xizmatiga jalb qilingan texnika va haydovchilarni nazoratdan chetda qoldirayotganligi, buning oqibatida esa nafaqat xizmat sifati, balki harakat xavfsizligiga ham putur etayotganligi ta'kidlandi. Bundan tashqari majlisda yo'lovchilar tashish jabhasida faoliyat yuritayotgan korxonalar hamda avtoshohbekatlar o'rtasida o'zaro manfaatli shartnomalar tuzish, sun'iy “avto-shohbekatlar”ga barham berish, tarmoqda naqd pul tushumini ko'paytirish, aholiga noqonuniy ravishda transport xizmatlari ko'rsatuvchi shaxslar faoliyatiga chek qo'yish va boshqa dolzarb masalalar muhokama qilinib, komissiya va uning maxsus ishchi guruhi a'zolari hamda nazorat qiluvchi organlar vakillari oldiga tegishli vazifalar qo'yildi.
Shuningdek, komissiya majlisida viloyat hududidagi bir qator yo'nalishlarda yo'lovchi tashish huquqini berish bo'yicha tender o'tkazildi.
Ko'rildi 153 marta |
