Eksport hajmi 2 milliard dollardan oshdi Qo'shilgan sana: 2010-02-15 Muallif: T.NIZOMOV Mamlakatimizda eksportbop mahsulotlar ishlab chiqaruvchi korxonalarni qo'llab-quvvatlash va rag'batlantirish hamda eksport salohiyatini mustahkamlash bo'yicha qabul qilingan amaliy choralar samarasi o'laroq 2009 yilda viloyatimizda eksport hajmi 2 milliard 68,7 million dollarni tashkil etib, bu borada oldingi yilga nisbatan 162,3 foizlik o'sishga erishildi.
Viloyat tashqi iqtisodiy aloqalar, investisiyalar va savdo boshqarmasidan olingan ma'lumotlarga ko'ra, vohamizda o'tgan yili tashqi savdo aylanmasi hajmi 2008 yildagi bilan taqqoslaganda 137,7 foizga ortib, 2 milliard 461,6 million dollarga etdi.
Mutaxassislarning ta'kidlashicha, viloyat tashqi savdo aylanmasi miqdorining bir yilda bunday yuqori darajagacha ko'tarilishi eksport hajmining sezilarli darajada oshishi evaziga ta'minlangan. Zero 2008 yilda viloyatimizdan 1 milliard 274,3 million dollarlik mahsulot va xizmatlar eksport qilingan bo'lsa, 2009 yilda mazkur raqam yana 794,4 million dollarga ko'paygan va ilk bor 2 milliard dollardan oshgan. Bir yil ichida eksportchi korxonalar soni 53 tadan 65 tagacha ortdi. 2009 yilgi eksport tarkibida energiya tashuvchilar ulushi 88,1 foiz, paxta tolasi 7,7 foiz, kimyo mahsulotlari va plastmassa 2,9 foiz, xizmatlar 0,4 foiz, oziq-ovqat mahsulotlari 0,3 foiz, boshqa tovarlar 0,6 foizni tashkil etdi.
Shuningdek, 2009 yil davomida viloyatimizga sal kam 393 million dollarlik mahsulot va xizmatlar import qilinib, ushbu miqdorning asosiy qismi mashina va uskunalar (69,9 foiz) hamda qora va rangli metallar (21,7 foiz) hissasiga to'g'ri keladi.
Ko'rildi 184 marta |
