Bugun Sho'rtan gaz-kimyo majmuasiga qarashli “Lochin” oromgohida “O'zbekiston madaniyati va san'ati forumi” jamg'armasi, “Kelajak ovozi” yoshlar tashabbuslari markazi, BMT aholishunoslik fondi (UNFPA) va Britaniya Kengashi (British Council) tomonidan tashkil etilgan “Kelajak ovozi” yozgi o'quv-oromgohining yopilish marosimi o'tkaziladi. Yurtimizdagi eng faol yoshlar jam bo'lgan ushbu oromgohda ikki hafta davomida turli yo'nalishlarda o'quv-amaliy mashg'ulotlar, madaniy-ma'rifiy tadbirlar, sport musobaqalari hamda qiziqarli uchrashuvlar uyushtirilgan ekan, ularning har biri ishtirokchilarda katta taassurot qoldirdi. -Kuni kecha bu erdagi amfiteatrda Qashqadaryo viloyati hokimi, senator Nuriddin Zayniev yoshlar bilan uchrashdi, - deya xabar qiladi “Ommaviy axborot vositalari” yo'nalishining a'zosi, oromgohda tashkil etilgan “Eng yaxshi maqola” tanlovining g'olibi Shohrux G'aniev. – E'tiborli tomoni: ushbu uchrashuv rasmiylikdan xoli, ko'proq ochiq muloqot shaklida o'tdi. Viloyat hokimi samimiyat bilan barchamizga qiziqarli tarzda jahon iqtisodiyotidagi o'zgarishlarga ta'rif berdi hamda moliyaviy inqiroz sharoitida turli usullarni qo'llayotgan mamlakatlar natijalarini taqqosladi. Va bu, shubhasiz, hammamiz uchun juda foydali “master-klass” bo'ldi.
Shuningdek, ushbu uchrashuvda yurtimizda yoshlarga yaratilgan sharoitlar haqida so'z yuritilib, shu ishga munosib hissa qo'shib kelayotgan Nuriddin Zaynievga “Kelajak ovozi” yoshlar tashabbuslari markazining ravnaqi yo'lidagi xizmatlari uchun maxsus diplom topshirildi. Darhaqiqat, oromgohda yaratilgan muhit yoshlarni ko'proq ijod qilish, qolaversa, yangiliklar kashf etishga undayapti va buning samarasi o'laroq amaliyotda ham katta foyda keltirishi mumkin bo'lgan usul va texnologiyalar paydo bo'layapti. Ha, aytgandek, barcha jamoalar o'rtasidagi “Quvnoqlar va zukkolar” festivali, “Kelajak ovozi” yozgi o'quv-oromgohidagi Kulgu kunining bosh tadbiri sifatida Qobiliyat kuniga ulanib ketdi, undan “estafeta tayoqchasi” Do'stlik kuniga o'tdi. Bugun esa oromgohda tantanali yopilish marosimi va Birdamlik kunidir...
