Qarshi shahri o'tgan haftada yana bir nufuzli turnir - plyaj futboli bo'yicha IV O'zbekiston kubogining ayollar o'rtasidagi bellashuvlariga mezbonlik qildi. Musobaqada 9 ta jamoa - “Sevinch”, “Olimpiya” (ikkalasi ham Qarshidan), “Qushbegi-Olimpik” (Toshkent), “Chirchiq” (Toshkent viloyati), “Sherdor” (Samarqand), “Umid”, “Yoshlik” (ikkalasi ham Buxorodan), “Jizzax” (Jizzax), “TerDU-Surxon” (Termiz) qatnashdi. Ochig'ini aytish kerak, bu yilgi turnir murosasiz va qizg'in kurashlarga boy bo'ldi. Sababi musobaqada ishtirok etuvchi jamoalar soni bu safar o'tgan yilgiga qaraganda 3 taga ko'paydi. Kubok musobaqasi ishtirokchilari dastlab uch guruhga bo'lingan holda o'zaro bahs olib bordilar.
Bu guruhlarda yuqori natija ko'rsatgan 4 jamoa – “Sevinch”-“Sherdor” hamda “Olimpiya”-“Yoshlik” jamoalari o'rtasida yarim final bahslari o'tkazildi. Dastlabki yarim final uchrashuvi “Sevinch” qizlarining g'alabasi bilan yakunlandi. Vladislav Xan shogirdlari samarqandliklar darvozasiga javobsiz 4 ta to'p kiritishdi. “Olimpiya”-“Yoshlik” bahsida ham maydon egalari g'alaba qozondi (5:2). Final o'tgan yildagidek voha derbisiga aylandi. Unda “Sevinch” va “Olimpiya” o'zaro bahs olib bordi. Ushbu jamoalarning guruh bosqichidagi bahsida “Sevinch” qizlari 5:4 hisobida ustun kelgandilar. Hal qiluvchi o'yin ham ularning ustunligida o'tdi. Uchrashuvda 6:1 hisobida g'alaba qozongan “Sevinch” futbolchilari ketma-ket to'rtinchi marta O'zbekiston kubogi sohibi bo'ldilar. Uchinchi o'rin “Yoshlik” (Buxoro) jamoasiga nasib etdi.
