Taqdimotda viloyat hokimi Murotjon Azimov boshchiligida viloyat sektorlar rahbarlari, tegishli tashkilot, tuman sektor rahbarlari va mas’ul tashkilotlar hamda tadbirkorlar ishtirok etdi.

Taqdimotda tuman hokimi Samad Hasanov 2024-yilda tumanda sanoat, xizmat ko‘rsatish, qurilish, qishloq xo‘jaligi, bandlik masalalarida amalga oshirilishi rejalashtirilgan loyihalar to‘g‘risida to‘xtalib o‘tdi.

Xususan, 4 ta kichik sanoat zonasida qiymati 313 milliard so‘mlik loyihalar ishga tushiriladi. Loyiha qiymati 82,5 million dollarlik 29,4 MVtlik 5 ta mikro GES faoliyati yo‘lga qo‘yiladi. Hududiy investitsiya dasturlari doirasida 24 ta loyiha amalga oshiriladi.

Qolaversa, tumanda turizmni rivojlantirish maqsadida joriy yilda 45 ta loyiha yo‘lga qo‘yilishi rejalashtirilgan. 60 million dollarlik 3 ta mehmonxona, 2 ta restoran, 2 ta avtoturargoh, savdo-ko‘ngilochar markaz, bolalar o‘yingohi va 2 ta piknik hudud tashkil etiladi. Hududiy tadbirkorlar tomonidan 298 milliard so‘mlik 35 ta loyiha amalga oshirilishi ko‘zda tutilgan. Natijada sayyohlar qamrovini o‘rtacha 500 mingdan 1 millionga oshirish kutilmoqda.

Shuningdek, tumanda xizmat ko‘rsatish, ishlab chiqarish, qishloq xo‘jaligi sohalarida ham manzilli dasturlar mavjud.

Taqdimot doirasida viloyat hokimi Murotjon Azimovning Shahrisabz tumani tadbirkorlari bilan uchrashuvi ham tashkil etildi.